Myanmar rampum huap Ngakchia Ni Hakha ah an tuah
Myanmar rampum huap Ngakchia Ni cu Hakha Cozah Tualleng sianginn ah February 13 ah an tuah i, Chin Ramkulh Cozah lei in Social Affairs Zung in Officer Daw Khin Ma Aye nih biachimnak a ngei.
“Hi nicaan kan tuah mi hi, mah zawn i ruat loin ram le miphun ca ah a nunnak tiang a petu General Aung San i a thinlungput le a ruahnak kha hngalh caamcin nakding le upat peknak ca ah tiin a chuah ni February 13 hi Myanmar ram Ngakchia Ni tiah Social Affairs Minister Zung hruainak in Myanmar ram pumpi ah sunglawi taktak in kan tuah mi a si,” tiah Social Affairs Zung in Officer Daw Khin Ma Aye nih Ngakchia Ni tuahnak hmun ah a chim.
“Ngakchia hna an thancho khawh nakhnga ramkip nih papek in an tuan cio bantuk in Myanmar ram zong ah ngachia an thancho khawh nakhnga tiin, 2014 kum ah phung kan ser. Hi bantuk phung kan sernak a ruang cu Myanmar rampi nih ngakchia hi biapi ah a chiah ca ah a si. Cucaah tualleng sianginn dirhnak nawl zong kan peknak hna a si. Sayamate zong ngakchia chimhcawnpiak an thiam khawh nakhnga kanmahlei zong nih training kan tuah lengmang,” tiah Daw Khin Ma Aye nih a chim.
“Kan rampi nih daihnak a herh bantuk in, kan innchungkhar zong ah daihnak a biapi tuk ve. Innchungkhar ah nulepa kan i sik kan i velh ahcun, ngachia ca ah a tha lo. Nupi vaa kan ngeih lai zong ah timh ciammaan tein kan ngeih a herh. Zeitik ah dah fa kan ngeih lai. Zeitindah kan fale kan zohkhenh hna lai ti mi i timhlamhcia kan herh. Ngakchia pakhat i a nunnak hi a biapi tuk. A ngakchiat lio ah him tein a nun khawh lawng ah, zumhnak a ngei kho lai. Anmah le mah an i zumh khawh nakhgna le midang cung ah zawnruahnak lungthin an ngeih khawh nakhnga kan cawnpiak hna a herh. Innchungkhar lawng ah si loin khoika hmun an phak zong ah thutdir zia an thiam khawh nakhnga tualleng sayamate le nulepa i bawm in kan cawnpiak hna a herh,” tiah a chinchap.
Hi Myanmar ram Ngakchia Ni ah, Hakha Cozah tualleng sianginn ngakchia, biaknaklei tualleng nagkchia le private sianginn ngachia hna an i tel i, General Aung San konglam he aa pehtlai mi hla le biazai in hmuhsaknak an ngei. Cun, Laksawng peknak zong an tuah, tiah kan theih.
