Myanmar rampum huap in a voi khatnak an tuah mi M-Pop hlasak zuamnak le laam zuamnak ah kanmah Chinmi chung in Vailam tlang, Vambai khuami Mai Sui Hlei Thluai le a hawile minung 2 hna cu final an kai tiah kan theih.
Hi kong he pehtlai in Mai Sui Hlei Thluai nih, “Kei hi Pu Van Ham le Pi Ni Bor hna i an fanu ka si i, taangnga ka rak kai in Yangon ah kan um. A ralai mi 2020 March 1 suimilaam 9:00 pm in phu thum nih pakhatnak kan i cuh lai. Pakhatnak hi kan ngah hrimhrim ko lai tiah zumhnak ka ngei i, Pathian sin zong ah ka hal peng mi a si. Kei hi ka hawile pahnih kaa sawm hna i, kannih phu ah minung pathum kan si. Ka thin cu a phang pah ngai, a ruang cu kei hi hla lei ahcun ka ti khawh pah ko nain laam lei tu ahcun ka ti kho hrimhrim lo ca ah a si. Asinain Pathian bochan bu le mizapi nanmah bochan bu tein kaa zuam lai. Voting System, a si ve ca ah nan fanu nan naunu nan ka vote naklai zong Bawi Khrih min tein kan nawl hna,” tiah The Hakha Post ah a chim.
Mai Sui Hlei Thluai hi Thantlang Peng, Vailam tlang Vambai khuami a si i, Dagon University in Philosophy a dih. Cun, hi aa zuamnak hi amah lawng si loin a hawile Henny (Kawl) le Naw Lae Wutt Yi (Karen) aa sawm hna i, amah hi an Group ah a lu bik a si tiah kan theih.
Hi M-Pop zuamnak hi pakhatnak laksawng ah kyat sing 300 le Mini Album chuahpiak an si lai. Kan farnu Mai Sui Hlei Thluai ca ah na thazaang rak chuah ve.
Voting number 8991 ah 7 tiin kua law vote rak pe ve. Mytel, MPT, Ooredoo, le Telenor in vote pek khawh a si.
