September 9 thawk in a surmi ruahpi ruang ah Myanmar ramchung hmun tampi ah tilianhnak a chuak i inn le lo tampi a phum caah minung tampi harsatnak an tong, tiah kan theih a si.
Ti a lianh ruang ah Shanram Tachileik khua, Karenram Myawaddy khua, Pago ramṭhen Taungngo peng, Monram, Karenniram le Naypyidaw ah tilianhnak a chuak i mizapi khausaknak innchung ah ti a luh pin ah umkal khawh lo tiang in lampi ah ti an lut.
Naypyidaw, Tatkung peng tilianhnak ah minung 1,000 leng harsatnak an tong i, Shanram Tachileik zong ah minung 5,000 leng himnak hmun ah an chiah hna.
Shanram chung ṭhiamṭhiam a simi Kalaw khua, Mong Hsat khua le Kengtung khua hna zong ah ti an lut i hi hnu ni tlawmpal chung tiang ti pehtlai in a kai ko, tiah an zumh.
Karen, Mon, Rakhine le Karenni hna zong tilianhnak a chuak ve. September 12 tiang ruah pehtlai in a sur lai tiah ruahdamh a si caah mizapi ralring tein um ding in NUG nih forhfialnak zong a tuah.
