A ra lai ding 2021-2025 kum karlak i a kai ding Myanmar ram Cozah thar ah tlangcung miphun chung in Vice President an si lai tiah NLD Party Vice-Chairman Dr. Zaw Myint Maung nih a chim.
“NLD nih a hlan lio tein siseh, atu zong ah siseh kan aupi mi le kan chim bik mi cu tlangcung party miphun hna kong hi a si ko. Cun, 2015 kum lio zong ahkhan Vice President ah tlangcung mi chung in Chin miphun Pu Henry Van Thio a rak si ko. Cun, atu Cozah thar a kai ding zong ahhin tlangcung mi hna chung in President cu an si hrimhrim rih ko lai ti ka zumh. Chim a hau ding hmanh khi a si lo, an si hrimhrim ko lai,” tiah 2021 January 24 i Party meeting an tuah dih hnu ah a chim.
Cun, Pyidaungsu Cozah Lutlai chung zong ahhin tlangcung miphun hna i tel kho ding ruahchannak tampi a um khomi a si i, atu tlangcung miphun hna Minister Zung pawl zong ahhin tlangcung mi lawng te an si ko tiah Dr. Zaw Myint Maung nih a chim.
“Tutan zong hi ukhruainak lei ahcun tlangcung mi hna hi papek in thim an si ko lai. Chim duhmi cu a hlannak hmanh in tutan ahhin tamdeuh um khomi a si. An ca ah caan tha deuh zong a si. USDP lei siseh, ralkap lei siseh rian khinh an si lai lo ti duhnak zong a si lo. A biapi mi cu ram ca ah biatak tein rian a tuan mi an si ahcun, Pyidaugsu Cozah chungtel chung zong ah an i tel ko lai,” tiah a cunglei minung nih a chimchap.
