Myanmar ram chung COVID-19 zawtnak a ngei mi poh ni 11 lawng sii-inn ah umter cang ding in Ramkomh Ngandamnak le Zaanglek Zung nih mizapi sin ah thawngthanhnak a tuah cang tiah Chin Ramkulh, Cozah chimphuannak nawlngeitu Minister Pu Soe Htet sin in thawng kan theih.
Minister Pu Soe Htet nih, “Ramkomh Ngandamnak Zung lei nih COVID-19 zawtnak a ngei mi poh ni 11 chung lawng sii-inn ah umter ding in mizapi sin ah thawngthanhnak an tuah. Ni 11 chung an um hnu cu positive an si pek, negative an si pek chuahter an si dih cang. Ngandamnak Zung lei nih an chim ning ahcun hi zawtnak hi ni 11 pin cu i chawnhbarh khawh a si ti lo an ti,” tiah The Hakha Post ah a chim.
2020 March 23 in nihin tiag Chin Ramkulh chung ah COVID-19 zawtnak ngei minung 286 an um cang i, hi chung ah a tam cem hi Tedim Peng chung in a si. Tedim Peng chung hmanh ah Tuithang khua hi zawtnak i chawnhbarh a tam cemnak hmun a si i, 2021 January 7 tiang ah zawtnak ngei minung 35 an um tiah theih a si.
