Ramkomh Ngandamnak le Zaanglek Zung nih 2020 March 27, Myanmar ramchung ah COVID-19 zawtnak hrik a ngei mi minung pahnih an hmuh thannak kong mizapi sin ah a thanh, hrik ngei mi minung 5 an sic ang.
Atu zawtnak hrik a ngei mi pakhat hi Mandalay Ramthen, Chanmitharsi Peng ah a um mi American khuasa, kum 33 upa a si. Mah mi pa hi American ram in Myanmar ram, 2020 March 19 ah Yangon a phan. 2020 March 22 ah a cumpi, a taksa a lin, a tha a baa i 2020 March 25 ah Mandalay sii-innpi ah aa thlop i, Gandawnadi sii-inn ah an thialter hnu ah amah lawng an umter. Athi hi Yangon Datkhuaikhan ah an kuat i 2020 March 26 zaanlei sang ah COVID-19 zawtnak hrik a ngei tiah an thanh.
Cun, pakhat pa deuh hi Yangon Ramthen, Mingalar Taungnyunt ah a um mi kum 69 upa a si. Hi pa hi Hnar cancer a ngei i Australia ram ah thla khat hrawng a vai i thlop. A rak kir lei ah hin Singapore ah ni 4 hrawng a caam ta i 2020 March 14 ah Yangon a phan. 2020 March 18 ah a cumpi, a taksa a lin, a hrom a fak i 2020 March 25, Yangon sii-innpi ah lunghrinh mizaw chiahnak ah an chiah. A thi Datkhuaikhan ah an kuat ve i 2020 March 26 ah COVD-19 zawtnak hrik an hmuh ve.
2020 March 25 in 2020 March 26 suimilaam 6:00 pm tiang Myanmar ram chung ah COVID-19 zawtnak hrik a ngei lai tiah lunghrinh mi minung 48 an i chap. Hrik a ngei mi zong minung 5 an sic ang. Vawleipi huap in chim ahcun, COVID-19 ruang ah 2020 March 27 (8:00 AM) tiang a thi mi minung 22,020, zawtnak hrik a ngei lai tiah zumh mi minung 486, 592 an si cang i zawtnak in a dam than mi minung 115,850 an si tiah kan theih.
