Zeiruang ah dah miphun party kan dirh ti ahcun Chin miphun hi kan miphun sinak ah siseh, kan nunphung, kan biaknak, kan caholh le kan ramkheel ah kan damlonak a sau i hi dam nakding ah miphun party a herh ca ah kan dirh mi a si tiah Pu No Than Kap nih January 20 Hakha ah a chim.
“Kan miphun a zaw kan ti mi cu Kawl miphun uknak ruang ah kan caholh, kan nunphung, kan biaknak le kan fimcawnnak hna tlau aa timh tik le a rawk cuahmah mi hi a si. Hi lio ah annih Kawl miphun cu an holh le an ca a thangcho thluahmah. Kannih kan biaknak an kan khap lio ah annih cu biaknak harnak an tong lo, zalonnak a um. An nunphung a rawk lo. Tangcheu in Ph.D tiang an caholh, an biaknak, an nunphung le an tuanbia an kan cawnter lio ah kannih cu kan miphun a dam lo,” tiah Chin party pathum an i komh hnu ah Chairman pakhat a si ve mi Pu No Than Kap nih a chim.
“Cu a si ca ah annih Kawl miphun ca ah cun Democracy hi a za tuk. Tlangcungmi nih Federal kan ti lengmang mi hi annih nih cun biapi ah an chia lo. A ruang cu Federal nih aa tinh mi kan nunphung le kan biaknak, kan caholh le uknak mah tein i zohkhenh khawh nakding kha an duh lo,” tiah Pu No Than Kap nih a chimchap.
Cucaah kan miphun kong hi kan khualipi Hakha Cozah ah ceih in i lim kho ve ding in Chin miphun party nih teinak kan hmuh le Hluttaw kan tlaih dih a hau cang. Cu lawng hmanh si lo in Chief Minister zong hi miphun party chung minung an si hrimhrim a hau cang. Hi kong hi zapi nih kan fian ahcun kan miphun hi a dam ko lai tiah Pu No Than Kap nih a chim.
