Myanmar ram hruainak cu February 1 in kum khat chung ralkap kut ah umter a si thok in Myanmar ram chung ah dirhmi Japan Company cheukhat hna cu dirter chung an si tiah theih a si.
Myanmar ram chung ah dirhmi Japan company ngan Suzuki (Myanmar) Motor sernak company le Toyo ink SC Holdings company hna rian cu chikhat dirter chung a si. Suzuki (Myanmar) Motor Co., Ltd le Suzuki Thilawa Motor Co.,Ltd hna hi Japan Yuan 12 billion dih in Myanmar ram chung ah rak dirhmi company lian pakhat an si tiah kan theih.
Suzuki company hi Carry, Ciaz, Ertiga le Swift timi motor pawl hna a serchuahtu an si tiah kan theih. Suzuki company nihhin kum 1 ah motor 40,000 tluk peng serchuah aa timh mi a si tiah theih a si.
A dang Japan company pakhat si ve mi Toyo ink SC Holdings zong nih an rian chikhat cu an dirter ve i, Nippon Airways (ANA) vanlawng zong chikhat zuang rih lo ding tiah a chim, January 3 ah a zuang ding mi zong zuang rih lo in khuacaan kan cuan than rih lai tiah thanhnak a tuah tiah kan theih.
Cu bantuk in tu thla chung ah honnak tuah ding mi TOYOTA company zong nih khuacaan kan cuan hmasa lai tiah thanhnak a tuah. Myanmar ram thlennak tete a hun um hnu in Japan company telh in Myanmar ram chung ah Company 443 riantuan ding in an hung lut tiah kan theih. (Ref: DVB)
