May 16, 2023
Mizoram ah aa dor mi Myanmar ralzaam hna nih Mizoram ramkheel ah i teltum lo ding le Mizoram upadi zulh ding in Committee Representing Chin State Hluttaw (CRCH) nih a thanh.
Cathanh a chuah mi ah cun thawngthanhnak pathum a um i, nihin nithla khenh in CRCH nih a chuah mi a si.
Mizoram ramkheel kong le a ra lai mi thimnak kong ah Chin Hluttaw palai pawl kan i teltum lo i hmailei zong ah kan i teltum lai lo tiah Chin Hluttaw palai hna nih an thanh.
Cu bantuk in, Myanmar ralzaam hna zong nih Mizoram ramkheel kong le thimnak kongkau ah i teltum lo ding in cathanh ah an langhter.
Cun, Myanmar ralzaam hna nih caan karlak i dornak Mizoram chung upadi pawl upat ding le cu upadi pawl zulh ding, sualnak tuah lo ding, rithaisii hman lo ding le zuar hrimhrim lo ding zong forhfialnak a thanh.
