Mizoram, Lawngtlai Lai mino bu Central Young Lai Association (CYLA) nih AA hriamtlai sin ah eidin tirawl, diesel le petrol phakter lo ding in a phihmi kong he pehtlai in AA nih lungtlin lonak a langhter.
Myanmar ram lei buaibainak kong ah India ram i mino bu pakhat nih atu bantuk in aa teltum hi cohlan awk a ṭha lo tiah AA chimnak nawlngei U Khaing Tuh Khah nih a chim.
YLA nih phihkhamnak a tuahmi kong he pehtlia in U Khaing Tuh Khah nih, “Annih hi India rammi, India ID aa tlaihmi an si. Hi bantuk mino bu nih Myanmar ram lei i anmah miphun hna karlak buaibainak ah aa rak tel ve hi cu thil sining a buaiter chinchin lai. India lei bu pakhat nih Myanmar ram lei buaibainak ah aa rak i telmi hi cohlan awk zong a tha lo,” tiah Irrawaddy thawngzamhnak sin ah a chim.
AA nih Chinram ah lut in Chin hriamtlai bu karlak ah thisen chuah le nunnak i laak tiang in buaibainak a chuahpi lawng si lo in ralzaam a si lo mi Rakhine pawl hriamnam he Lawngtlai District ah an rak luh tawn ruang ah YLA nih Lawngtlai-Paletwa lampi cu June 24 in a rak khar.
Cu hnu cun Lunglei District le Saiha District zong nih Myanmar ram lei ah Diesel le Petrol phorh ti lo ding in an khar ve.
Lawngtlai le Paletwa karlak lam phih kong ah AA nih CNF/CNA sual a phawt nain CNF/CNA chimnak nawlngei Salai Htet Ni nih cun hi kong ah hin CNF/CNA kan i telnak a um lo, tiah Irrawaddy ah a chim.
CYLA tu nih cun lam a phihmi kong he pehtlai in Chinram ah AA nih kahdohnak a tuahmi a ngol a herh i, CYLA he ton biaruahnak zong a ngeih a herh. Cu lo ahcun lam kan hong lai lo, tiah a lungput a langhter.
