Nihin October 31, Operation 1027 cawlcanghnak ah SAC ralhraang camp panga kan laak tiah TNLA nih an thanh.
An laakmi camp hna cu Lashio peng Mongpar camp, Namhkhan peng Hat Yai camp, Muse (105) meng ah a um mi SAC camp, Kutkai peng View Point camp hna an si tiah an langhter.
TNLA Brigade-1 ramchung, Muse peng (105) meng ah a ummi SAC ralhraang camp he aa tlai mi Pyituhsit camp No. 4561 cu nihin zanlei suimilaam 3:15 ah an laak khawh.
TNLA Brigade-5 ramchung, Kutkai peng SAC ralhraang View Point camp cu October 27 ah kah hram an thawk i, nihin October 31 ah an laak khawh.
Cawlcangh hram an thawk ka i SAC camp pathum an rak laaknak Namhkam peng i a um mi camp pahnih zong nihin ah an laakchap.
Lashio peng i a um mi SAC camp cu kah hau lo in SAC ralhraang an zaam dih caah TNLA nih meithal puah lo in an laak tiah theih a si.
TNLA nih Lashio peng Monekyet camp an kah lio ah, SAC nih jet vanlawng in voi 8, Mi-35 Helicopter in voi 4 kahdohnak an tuah.
TNLA nih nihin ah SAC ralhraang camp panga an laak hlei ah MNDAA, AA hna nih nizaan le nihin ah camp pali an laak.
AA le KIA nih Kachin ramkulh Waingmaw peng ah a um mi SAC ralhraang Gang Dau Yang camp cu nihin ah an laak.
TNLA, MNDAA, AA nih ni nga chung ah SAC ralhraang sakhaan 90 leng an laak can tiah ramchung media hna nih an langhter.
