Thantlang Peng Pyithu Hluttaw Palai Pi Ni Sui Lian nih 2019 December 6, Pyidaungsu Hluttaw meeting ah Chin ca chimbawmtu (Teaching Assistance, TA) chap ding a hal mi cu Pyidaungsu Fimcawnnak Zung nih a ruahpiak cang i 2019-2020 tangka kum (budget year) ah minung 271 an chap than lai, tiah March 4 ah kan theih.
“Hi ka hal mi hi Pyidaungsu Fimcawnnak Zung in Deputy Minister U Win Maw Thun nih a ka leh mi a si. 2019-2020 cacawn kum ah Chin Ramkulh ah Chin ca chimbawmtu (TA) hi minung 468 rian pek an rak si. Cun, TA hi Mindat ah minung 5 rian pek an si than i an dihlak ah 473 an si. Cun, TA hi Chin Ramkulh khua dangdang ah minung 271 a thar chap than ding in kan timhtuah lio a si. Thantlang Peng ah TA minung 25 rian pekchap ding le cu hlan i siangakchia 40 an um lawng ah siangcachim pek ding ti mi kha atu cu siangakchia 20 an um ahcun TA pek ding, tiah policy kan in thlenpiak cang hna, tiah a ka leh. Cun, hmailei ah siangcachim a herh ning in zohfelpiak ding kan si. Hihi Chin Ramkulh Cozah tuanvo ngeitu nih a tuanchuah ding mi a si i an tuanchuah lo ahcun mizapi nih tanrual in kan tuah ding mi a si,” tiah MP Pi Ni Sui Lian nih The Hakha Post ah a chim.
Hi TA kong hi Hluttaw Palai Pi Ni Sui Lian nih, Chinram cu pehtlaihnak lamsuul zong a tha lo, thanchonak a nuar bik kan si. Fimcawnnak ah a der bik zong kan si. Siangcachim kan chambau tuk ca ah nan kan ruahpiak kho hnga maw, tiah Pyidaungsu Hluttaw meeting ah a rak hal mi a si i Pyidaungsu Fimcawnnak Zung nih atu bantuk in a ruahpiak mi a si, tiah kan theih.
