Kokang ralkap MNDAA le a hawikom hriamtlai phu hna nih Kokang ram chung ah a um mi SAC camp pawl pakhat hnu pakhat in an laak hna i, kahdohnak ah SAC ralhraang hriam ngan hna, machine gun hna tel in meithal kuanzen tampi an laak khawh tiah theih a si.
Tu zing Monekoe kiangkap ah a um mi SAC camp pakhat an laak mi ah SAC hriamnam kuanzen tampi an laak lio video le hmanthlak hmuh an si.
“Tu zing ah Monekoe Phawngsai ah a um mi Manyan SAC camp ah laak mi hriamnam an si. Hriamnam laak khawh mi an tam taktak. Nizan in kah hram thawk a si i nihin ah an laak khawh,” tiah raalram thawnghram nih People’s Spring ah a chim.
MNDAA le a hawikom hriamtlai a si mi TLNA, AA hna nih “Operation 1027” timi min bunh in October 27 thawk in SAC camp pawl an kah hna. Ni thum chung ah SAC camp 60 hrawng kan laak khawh tiah MNDAA nih an thanh.
Nihin, ni thumnak operation ah MNDAA nih Kokang, Monekoe, Lashao, Mopan, Nansalat hrawng ah a um mi SAC camp pawl an kah hna i, chun tiang ah camp 11 an laak cang tiah theih a si.
Photo: PS (SAC camp kahdohnak ah laak mi SAC hriamnam kuanzen cheukhat)
