Shan ramkulh Chaklei, Moemeik khua Palek Sakhan cu Kachin miphun ralkap KIA le PDF phu komh nih kah ding in an kulh lio ah, sakhan chung um dihlak nih thantaar raang thlai in hriam an chiah tiah theih a si.
Moemeik Palek Sakhan cu nihin January 18, chun sml. 12:00 hrawng ah KIA le PDF nih kah ding in an kulh hna i cu lio ah cun SAC lei nih thantaar raang an thlai colh. A kah hmanh an i kap manh lo, tiah khuami chim mi cherhchan in SPM nih a tial.
Hriamnam a chia mi SAC ralkap le palek zat tu cu phung ning in thanhnak a um rih lo ca ah hngalh a si rih lo.
Moemeik khuachung SAC ralkap hmunkhuarnak hmun cheukhat zong dohthlengtu ralkap hna nih an laak khawh cang. SAC nih vanlawng le miakpi in pehtlai in a kah hna tiah ram chung media ngan hna nih an tial.
Moemeik peng ah LIB-348, IB-276 le IB-223 ti in SAC ralkap battalion pathum le TOC hmunpi pakhat a um. Cuhna nih cun Moemeik khuapi an sungh lo nakding ah faakpi in an i chang tiah theih a si.
