Shan ramkulh Chaklei, Moemeik peng cu SAC sin in an laak dih i, cu kahdohnak ah an laak mi SAC hriamnam hna cu nihin August 1 ah TNLA nih an hun langhter.
Moemeik khuapi cu TNLA le ṭangṭi phu nih June 27 in kah hram an rak thawk i July 31 ah an laak khawh.
OCH-21, LIB-348, IB-223, IB-276 tel in SAC ralkap camp dihlak, palek sakhan le ralkap hmunkhuarnak pawl an laak dih.
Kahdohnak chung ah Howitzer miakpi tel in hriamnam phun tling zun 250, 120 MM miakpi zun 1, 60 MM zun 19, 81 MM zun 9, point 5 meithalpi zun 3, RPG zun 16, Jammer 2, mortar zun 2, vanlawng kahnak meithal zun 1, pistol zun 3, mine, kuanzen tampi le ralkap thilri tampi an laak tiah theih a si.
SAC ralkap nih mizapi tinhchih in an kah hna caah khuami 3 an thi i 12 hma an pu. Sianginn pahnih le inn panga a rawk tiah theih a si.
