Mocha Cyclone thlichia nih Chin Ramkulh, Zotung Peng khua li chung inn 140 leng a hrawh i inn a rawk mi khuami hna harnak an tong tiah theih a si.
Thlichia nih inn a hrawh mi hna khua hi Hunglay khua, Tingsii khua, Ruava khua le Tilaw khua hna an si. Hi hna khua lak ah Hunglay khua le Tingsi khua hna hi an khua ning deng in a hrawh dih tiah theih a si.
Hi kong he pehtlai in Zotung CDF in tuanvo ngeitu pakhat nih, “Hunglay khua le Tingsi khua hi an khua ning ti awk in a hrawh. Minung hliam le nunnak liam tu cu an um lo. Amah belte hi hna khua hnih inn a hrawh ning hi a fah ca ah khuami lungrethei in an um ko,” tiah THP ah a chim.
Khua li ah inn a rawk mi zat cu Hunglay khua inn 60, Tingsi khua inn 50, Ruava khua inn 20 le Tilaw khua inn 10 hna an si tiah kan theih. Hunglay khua cu inn 80 an si i cu chung ah inn 60 a rawk cikcek i cu chung ah Biakinn le Biakinn quarter pawl an i tel tiah theih a si.
Cyclone Mocha thli chia nih hin nihin tiang thawng kan theih khawh tawk ah Tlangkhua ah inn 12, Lungding ah inn 1 le Hakha khuathar ah inn 5 a hrawh ve hna tiah theih a si. Pehtlaihnak a har ruang ah inn a rawk mi zat cu a cunglei langhter mi zat nakin an tam deuh kho.
