Mocha tiah min an sak mi cyclone thlichia cu May 12 ah Myanmar le Bangladesh ram karlak in a hraang kho tiah NUG, MOHADM Minister Zung nih ralrinpeknak a thanh.
Cu thlichia cu 2023 May 7 thawk in aa sersiam kho i, May 12 ah thazaang a thawng mi cyclone thlichia ah Myanmar le Bangladesh ram karlak zawn in a hraang kho tiah an langhter.
Cu thlichia ruang ah Myanmar ram Ayeyarwaddy ramthen rili kam, Nitlaklei rili kam thluan le Rakhine rili kam thluan ah thli a faak kho i tilet a tho kho. Ayeyarwaddy Nitlaklei rili ah tilet a san pen 24 tiang a phan kho. Thlichia cu suimilaam pakhat ah meng 95 hrawng in a hraang kho i, a fah deuh caan ah meng 110 tiang thazaang thawng in a hraang kho tiah khuacaan lei thiamsang nih an chim.
Tlangram zong ah ruah a faak, ti a lian kho i mincimhnak zong a um khawh caah ralring tein um ding ah ralrin peknak an thanh.
Photo Credit: Su Su San
