MNDAA sin ah hriam a chia mi Laukkai khua i SAC ralbawi paruk cu Lasho thonginn ah SAC nih thong an thlak hna, tiah People’s Spring thawngzamhnak nih a langhter.
Shan ramkulh, Laukkai khua ah a um mi Regional Operations Command–ROC (Dah-Kah-Sah) i SAC ralbawi paruk le ralkap 2,100 leng nih January 4 ah MNDAA sin ah hriam an rak chiah.
Hriam a chia mi SAC ralkap pawl hi January 4, chunhnu sml. 2:00 hrawng ah anmahle duhnak hmun cio ah kal ding in MNDAA nih an tawlrelpiak hna.
A dang SAC ralkap pawl cu Laukkai khua in motor le motorcycle in an kal nain Brigadier General (Bo-Hmu-Choh) rank a si mi ralbawi paruk tu hi cu Tanyan khua an phak in helicopter in Lasho lei ah an thiar hna.
Helicopter in Lasho an phak lecangka in SAC nih an paruk ning in thonginn ah an khumh hna, tiah People’s Spring nih a ṭial.
MNDAA nih Laukkai khua an lak dih hnu ah, “Kokang hmunram ah SAC ralkap pakhat hmanh an um ti lo, Kokang hmunram vialte cu kum 14 hnu ah Kawl ralkap kut in kan lak khawh ṭhan cang,” tiah January 6 ah thawngthanhnak an tuah.
