Mizoram, Saiha khua ah aa dor mi ralzaam ngakchia hna ca ah Myanmar Refugee Committee, Siaha (MRCS) nih nihin May 19 ah Refugee School (Siaha) ti mi min bunh in sianginn honnak an tuah.
Sianginn honnak cu Saiha khua, Colony sang YMA Hall ah zanlei suimilaam 3:00 in 5:00 tiang tuah a si i tawlreltu committee chungtel hna, siangngakchia hna le nulepa minung 250 leng an i tel kho.
“Ralzaam cu kan ram a that than tikah a kir than ding kan si. Kan fale nih kan ram kan kir than tik ah an kum rup in sianginn an peh than khawh nakding le, hika ah Myanmar ram ca cawn ning in an cawn khawh nakding ah hi sianginn hi MRCS nih a tawlrel mi a si,” tiah Sianginn Principal Dr. Peng Hmung Ling nih nih a chim.
Sianginn honnak ah MP Pi Ni Sui Lian nih pangpar hri a tan. MP Pi Ni Sui Lian, MRCS Chairman Dr. Khaivatha, Principal Dr. Peng Hmung Ling hna nih biachimnak an ngei i Pastor Ngun Thawng Lian nih Pathian bia in forhfialnak le thacamnak a ngei.
Sianginn cu NUG Cozah nih cohlan mi a si i New Saiha, Vety Kawn ah a um mi Little Diamond Sianginn ah a si lai. Kai ding in min a pe cang mi siangngakchia minung 192 an si i May 22 in kai hram thawk a si lai. NUG nih a khiah mi cacawn ning in cawn a si lai i taang cheu in taang 10 tiang cawn a si lai tiah tuanvo ngeitu hna sin in theih a si.
“Ca cawn nakding sianginn khaan pawl cu Little Diamond Private School nih a kan hlanh mi a si. Anmah sianginn an tum hnu, zanlei suimilaam 3:00 hnu in ralzaam sianginn kai a si lai i period pahnih cawn a si lai. Zarhte ni ah cun chun nitlak cawn a si lai,” tiah tuanvo ngeitu nih a chim.
Cu sianginn ah cun man pek hau lo in cawn a si lai i cawnpiaktu ding hna cu CDM a tuah mi siang cachim pawl an si. Saya/sayamah te thlahlawh le sianginn ca a dih ding mi tangka cu IRCC riantuannak in Carson Chin Baptist Church, Milwaukee, USA nih a bawmh hna lai tiah kan theih.
Mizoram chung ah ralzaam tam bik an i dornak cu Saiha district a si i Myanmar ralzaam thong hra hrawng an i dor lai tiah ruahdamh a si. Saiha khua chung ah ralzaam chungkhar 350 hrawng an um tiah kan theih.
Photo: The Hakha Post
