Chin Ramkulh he ramri a si i Myanmar ram mi minung tampi rian an tuannak le an umnak Mizoram COVID-19 i runvennak ca ah tiin Lockdown an tuah mi cu July 1 in a ngolter cang, mizaw minung 39 lawng an taang tiah thawng kan theih.
COVID-19 ruang ah Mizoram Cozah nih ni 101 chung Lockdown a tuah i, July 21 ni ah Cozah lei nih Lockdown an tuah mi cu an ngolter cang.
Hi kong he pehtlai in Mizoram khuasa Chinmi pakhat nih, “Lockdown hi Cozah lei nih ni 101 chung an tuah. Ni 101 a rauh hnu July 1 ni ahkhan an ngolter cang. July 1 in July 31 tiang Mizoram chung dawr pawl zong caan hman in an honter cang hna,” tiah The Hakha Post ah a chim.
COVID-19 zawtnak hi June 1 in Mizoram ah an hmuh i July 1 tiang ah COVID-19 zawtnak ngei minung 160 an si. Minung 160 chung ah minung 112 nih damnak an hmuh than cang tiah kan theih.
Cun, Dawr pawl hi cu caan hman in honter an si cang nain khualtlawng motor, sianginn le biakinn ah i pumh ti bantuk cu nawl an pe rih hna lo tiah The Aizawl Post nih a langhter.
July 1 tiang ah zawtnak ngei a taang rih mi hi minung 39 an si i, hi zawtnak ruang ah a thi mi cu an um lo tiah theih a si.
