Ruah faakpi in a sur caah Mizoram, Mamit District, Khantlang khua ah vawlei a min i ngakchia pahnih tel in minung pathum an thi tiah theih a si.
June 11 zaan suimilaam 10:00 hrawng ah vawlei a min i inn pakhat a cimh caah chungkhar pakhat in minung pathum an thi i pahnih hma an pu tiah tualchung media nih an langhter.
Mincimh ruang ah a thi mi hna cu a cim mi inn ngeitu Sanjiv Chakma (Kum 36) le a fale pahnih an si i an ruak an laak khawh cang hna. A thi mi Sanjiv Chakma i a fanu pakhat le a nupi cu thihnak in an luat nain hma an pu tiah theih a si.
A luan cia May thla dongh lei i a rak hraang mi cyclone Remal ruang ah Mizoram, Aizawl khua le kiangkap ah vawlei a min i minung 30 leng nunnak a rak liam cang.
