AA kong he pehtlai in Mizoram Chief Minister Pu Lalduhoma nih US ah a chimmi bia cu kap hnih ca ah ṭhathnemnak a chuahpitu a si caah lunglawm tein kan cohlan tiah AA nih a chim.
AA chimnak nawlngei U Khaing Tuh Khah nih, “Innpa ṭha biachim a si. Mizo le Rakhine cu kum caan saupi Kaladan vati a ding ṭimi kan si. Cucaah, atu bantuk in a dikmi lungput an ngeihmi cung ah kan i lawm tuk,” tiah a chim.
September 4 ah Indianapolis khua i Chin Evangelical Baptist Church (CEBC) ah Pu Lalduhoma le Chin mipi tonnak an ngei i, Pu Lalduhoma nih, “AA hi kanmah nakin thazaang a ṭhawng deuhmi an si caah anmah he i doh si loin i rualrem le hawikom ah ser ding an si,” tiah a chim.
Pu Lalduhoma nih a chimmi kong he pehtlai in AA nih an lungtlinnak an langhter i, hmailei ah Rakhine le Mizo karlak pehtlaihnak ṭhatter chinchin kan i zuam lai, tiah AA chimnak nawlngei U Khaing Tuh Khah nih a chim.
Indianapolis ah tuahmi Chin mipi le Pu Lalduhoma ton biaruahnak ah Pu Lalduhoma nih Chin miphun dohthelngtu bu hna pakhat le pakhat karlak ah siseh, biaknak lei bu pakhat le pakhat karlak ah siseh, zatlang bu hna pakhat le pakhat karlak zong ah siseh, lungrual tein hmun khat ah rianṭuan ṭi khawh a si nakhnga biapi in a chim, tiah kan theih.
