Mizoram, Champhai District ah rithaisii tlaih mi a tam i, tukum kum hramthawk in July 16 tiang rithaisii he aa pehtlai mi ND&PS case in minung 73 tlaih an si cang tiah Champhai District Level Narco Coordination Centre (NCORD) report nih a langhter.
Pa 63 le nu 10 tlaih an si i cu chung ah minung 53 cu Mizoram khuasa an si, ramdang minung 10 le State dang minung 10 zong an i tel tiah kan theih.
June 22 in July 21 tiang Champhai District Palek nih ND&PS Act, 1985 tangah case 15 an chuahpi. Cu case he aa sengtlai mi minung 24 tlaih an si i, minung 2 cu ramdang mi an si tiah kan theih. Department lei zulhdawi ning in tualchung market ah Rs. 1,12,08,000/- man Heroin gram 5006 le Rs. 40,400,000/ man tlaih a si tiah NCORD report nih a langhter.
Hi caan chung thiamthiam ah hin Excise & Narcotics Department, Champhai nih case 12 an chuahpi i, minung 12 tlaih an si. Cu chung ah ramdang mi cu an i tel lo. Tualchung atu lio a man rate in Rs 6,18,648/- man Heroin gram 516 le rithaisii phorhnak ah an hman mi LMV pakhat le Two Wheeler pahnih zong an tlaih.
Assam Rifles COB Champhai le Zokhawthar zong nih operation voi 6 an ngeihnak ah heroin gram 409.42 le Methamphetamine mu 20,000 an tlaih fawn tiah kan theih.
#TheHakhaPost
