Mizoram Aizawl khuapi Durtlang Sang ah inn cim in a thi mi le hliampu mi Cozah nih Rs 60,000,000 (Ks. 1,200,000,000) bawmhnak a pek hlai, inn satu le tuanvo ngeitu hna zong hlathlai in tazacuai timh a si, tiah kan theih.
Hi bawmhnak hi MNF Cozah nih a thi mi minung pakhat ah Rs 400,000 (Ks. 8,000,000) cio le a hliam mi hi minung pakhat ah Rs 200,000 (Ks. 4,000,000) cio a bawmh hna lai. Hi inn cim ruang ah a thi mi hi minung 3 an si, hliampu in sii-inn phan mi 9 an si.
“Pu Lalthanhawla hruai mi Congress party nih sifak santlailo ca ah a sak mi inn a si i a tha tuk. Asinain, tutan inn a cim mi kong he pehtlai in engineer ahodah a si, zei company nih dah a sak, ziknawh le eihmuar a um maw, ti hlathlaitu ding ah phu kan ser lai i thil pakhatkhat nincanlonak a um sual ahcun phungphai ning in tangka liamter le thongthlak an si lai,” tiah Mizoram Chief Minister Pu Zoramthanga (MNF President) nih media sin ah a chim.
Hi kong ah Aizawl khuasa The Hakha Post Cartoonist Vapual nih, “Mizoram Cozah cu Chinram Cozah chim hlah, Myanmar ram Cozah hmanh nih hi bantuk zawn ahcun kan tluk hna lo. Myanmar ram Cozah cu bawmhchanh cu chimlo, ramleng in bawmhnak hmanh a phit mi cozah a si. Kan rak tluk bak hna lo. Tlawm an ngai, thihloh le puicimh ton ah zaanghlei an cawi kho tuk,” tiah a chim.
Mizoram hi a luancia 2017 kum June thla chung ah faak ngai in a rak rawk bal. Inn 657 a rawk i minung 11 an rak thi. Hakha Rescue Committee hruainak in bawmhnak tangka sing 100 leng an rak bawmh bal hna.###
