January 1, 2023
Thawngtha Karhternak Group hruainak in Mizoram ah aa dor mi ralzaam hna nih, Lawngtlai Distric (Saiha khualu) ah a um mi Tlangpi khua ah ni thum chung rawl ulh in Myanmar ram damnak ding ca thlacamnak an tuah.
Cucu 2022 December 30 in 2023 Kum Thar ni tiang tuah a si i minung 220 hrawng nih rawl ulh in thla an cam. Rawl a ulh mi tam deuh cu Mizoram Saiha khua le kiangkap khuate ah aa dor mi ralzaam an si i pawngkam khuami cheukhat le Laitlang lei in a ra mi zong an i tel ve.
“Kan ram nih a rauh hlan ah thinlun, taksa le thlarau in damnak a hmuh khawh nakding ah atu bantuk in rawl ulh thlacamnak hi kan tuahnak a si,” tiah Thawngtha Karhternak Group Chairman Evan. Tha Cung nih THP ah a chim.
Cu rawl ulh thlacamnak a dih hnu in zarh khat chung camping tuah ding in timhtuah a si. Rawl ulh thlacamnak le camping ah Pathian bia cawnpiaktu hna cu Evan. Tha Cung, Rev. Thomas Tial Uk, Evan. Leng Cung Hnin, Rev. Lalthapuia, Evan. Biak Hmung, Evan. Bawi Hu le Evan. Biak Za Kam hna an si.
“Hi camping tuah nakding ah ram chung ram leeng in mi zeipoh nih pekchanhnak in thluachuah i ham khawh cio a si, kut a samh cia mi nan dihlak cung ah a dong kho lo mi a dawtnak thluachuah tlung dih ko seh,” tiah Thawngtha Karhternak Group Secretary Dr. Peng Hmung Ling nih a chim.
Tu tan rawl ulh in thla an cam mi ah: dohthlennak ah aa tel mi vialte ca; CDM a tuahmi hna ca; ralzaam hna ca; ralzaam kan i dornak ram hna ca; ralzaam bawmchantu hna ca le ram chung ram leeng Laimi dihlak nih taksa, thinlung le thlarau damnak kan hmuh ngakhnga ti in a tlangpi 30 leng aa tel.
