2020 May 26 chunhnu ah hrawng ah Paletwa Peng, Paletwa khua varal ah a ummi Khumi Chin miphun pawl umnak Ohrniletwa khua cu mizei ti theih lo mi hna nih inn 63 mei in an khangh tiah thawng kan theih.
Hi kong he pehtlai in RRCCI chungtel Pi Nang Wai nih, “Hi mei kanghnak hi a sawhsawh a si hrim lo. An tuah hram mi cu a si ko lai ti hi a fiang ngai. Rakhine ralkap AA le Cozah ralkap hna ah pakhat khat cu an si ko lai tiah lunghrinh an si ko lai ti hi mizapi nih kan lunghrinh mi hna an si,” tiah Tha Hakha Post ah a chim.
Atu mei in an khanghnak Mula Vum Avang khua hi kahdohnak ruang ah atu bantuk in mei an khangh hlan ah khuami dihlak an zaam dih tiah Paletwa Peng Hluttaw Palai U Hoi Tin sin in kan theih.
MP Pu Hoi Tin nih, “Atu mei in an khanghnak khua hi khuachung ah minung cu an um ti lo. Inn 120 an si. Inn 120 chung ah inn 63 a kaang. Mei a kangh caan hi fianglak in kan chim kho lo nain suimilaam 2:00 le 3:00PM kar hrawng ah a si. Mizei nih dah an khangh ti hi cu chim khawh a si lo. Aruang cu khuachung ah minung a um mi an um ti lo. Khua an tlaknak a hmumhma hi a bi ngai. Inn zong an i naih ngai ca ah inn khat a kangh a si cun a dang inn zong a tlaan ding khi a si. A kangh caan hi a sau ngai. Cun, atu bantuk in a tuahsertu hi khuami cu an si lai lo. AA le Cozah ralkap hna ah pakhatkhat cu an si ko lai tiah mizapi nih kan zumh mi le lunghrinh mi an si,” tiah The Hakha Post ah a chim.
January in May thla tiang AA le Cozah ralkap Paletwa pawngkam ah pehtlai in an i kap i, khuami a thi mi le harnak a tong mi minung zong an tam tuk cang tiah MP Pu Hoi Tin nih a chimchap.
Cun, 2020 May 23 ah Paletwa Peng, Tuireung Avang khuami minung pali thing- hlam an kalnak ah AA nih an tlai hna i May 25 ah an thlah than hna. May 23 thiamthiam ah nu pakhat banhla a tuk lio ah bomb an hmanh mi a lamh sual ca ah fak ngai in hliam a tuar i Paletwa sii-inn ah an chiah tiah kan theih.
AA le Cozah ralkap kahdohnak ruang ah Rakhine le Paletwa Peng ah January in April thla tiang a thi mi minung 101, hliam a tuar mi minung 258 an si tiah theih a si.
Photo/ Ko Kyaw Aung
