The Hakha Post nih a kum hnihnak tuah mi MISS The Hakha Post 2017 laksawng peknak cu 2018 March 10, CACC Hall, Hakha ah sunglawi ngai in an tuah.
Tutan Miss laksawng peknak ah Chin Ramkulh Cozah Social Affairs Minister Pu Pau Lun Min Thang aa tel kho. MISS ah Winner hmutu Mai Genevieve Van Iang Mawi le 1st Runner-up Mai Cung Cer Cin an i tel kho. Matupi in 2nd Runner-up hmutu Shwe Hle Sung hi aa tel khawh lo ca ah in a unu pakhat nih a ai-awhpiak.
“Hi thil nan tuah mi hi kan lawmhpi hna. Kaa lawmh tuk mi cu, Myanmar ramchung ah Chin miphun hi mitung niam bik kan si. Asinain, nihin ahcun mitung sang, tungtai thatha le mui dawhdawh kan in hmuh hna tik ah keimah pumpak zong kaa lawm tuk. Pum le rua in hawi kan tluk khawh nakhnga ca ah atu zong MCH hruainak in naupawi le ngakchia biatakte le papek in Chin Ramkulh Cozah nih kan tawlrelnak hi a si,” tiah Chin Ramkulh Cozah Social Affairs Minister nih a chim.
Hi kong ah The Hakha Post Chief Editor Pa Pui nih, “Hi kan tuah mi hi tinh mi le saduhthah tampi lak ah ramchung ramleng Chin mino hna i funtom khawh deuh nakding ca zong ah aa tel. Atu hi online vote deuh in kan tuah i kumvui lei cun online lawng si loin Hakha khua ah mui langh tein zuamnak kan tuah cang lai,” tiah a chim.
“MISS vote i peknak kong ah lungthianglo le a fianglo mi kan um pah. Vote tawlreltu hi committee a dang tein ser a si. Judge ti mi tlangtlatu zong an um i The Hakha Post Board of Director zong mark peknak he pehtlai in tawlreltu kan si. Mark/vote hi ramchung ramleng in pek an si i cucu tawlreltu nih a si khawh chung in kan tawlrel mi a si. Online vote a si bantuk in ahohmanh thleidan le tanh hleinak ngeih khawh a si lo. Hmailei ahcun hi naktha le tlamtling in kan tawlrel cang lai,” tiah Online Editor le MISS The Hakha Post Committee Chairman Salai KB Thawng nih a chim.
MISS The Hakha Post cu 2016 kum ah thawk mi a si i Falam in Mai Lal Biak Par nih winner luchin a hmuh. 1st Runner-up ah Tedim in Ning San Lian le 2nd Runner-up ah Matupi in Paw Hmawi Ling hna an si. 2017 kum ca ah Hakha in Mai Genevieve Van Iang Mawi nih winner luchin siseh, Falam in Mai Cung Cer Cin nih 1st Runner-up siseh, Matupi in Mai Shwe Hle Sung nih 2nd Runner-up laksawng an hmuh.
