Mandalay, Amyotha Kazat Yone, June 2 zaan ah tuah mi Miss Queen Empire Myanmar 2019 muidawh zuamnak ah Hakha khua um Kalay Myo aiawh in aa zuam mi Mai Zing Dawt Cer (Aa Dawt) nih Winner (Pakhatnak) tel in laksawng phun li a co.
Mai Zing Dawt Cer nih Miss Queen Empire Myanmar 2019 Winner pin ah laksawng dang pathum a co mi cu; Style (Style a thiam bik laksawng), National Costume (Miphun thuamthil humhsak thiam bik laksawng) le Popular (Mizapi nih uar bik mi laksawng) zong a hmuhchih.
“Ka nu le ka pa thlacamnak kha Pathian nih a theih i hi teinak Luchin (Winner Crown) hi ka co khawhnak a si. Cun, a ka daw i vote pek in thazaang a ka petu hawile thawng in a si ko. Nan dihlak cung ah kaa in chim khawh lo mi lunglawmhnak ka ngei,” tiah Miss Queen Empire Myanmar 2019 Winner Luchin a cotu Mai Zing Dawt Cer nih The Hakha Post ah a chim.
Hi Miss Zuamnak hi Myanmar Universe Academy Pageant Production nih a tawlrel mi a si i zuamnak hi phun li in tuah a si. Pa ngakchia, Tlangval, Nungak le Nutung tiin zuamnak a um i an dihlak minung 70 tluk an si. Mai Zing Dawt Cer nih Nungak Muidawh Zuamnak a si mi Miss Queen Empire Myanmar ah teinak a hmuh hi a si. Nungak muidawh zuamnak ah Kalay Myo aiawh, Taunggyi aiawh tibantuk in nungak 18 an i zuam, tiah kan theih.
June 2 zaan hlan ah Mandalay um Thilthuam lei Thiamsang (Fashion Designer) pawl nih muidawh aa zuam mi pawl cu nithum chung camp ah chiah in Fashion lei he aa pehtlai mi chimh, cawnpiak, ngiat le zoh an si. Cu chung ah Miss a hmu ding ah aa tlak bik ti mi kha thim a si, tiah kan theih.
“Facebook Page in vote pek mi kha cu Popular laksawng ca ah a si. A dang cu camp kan um chung ah mark a kan pek. Hmailei ah lam tampi aa hong nain fimcawnnak lei hi papek deuh kaa tim rih,” tiah Mai Zing Dawt Cer nih a chimchap.
Kalay Myo aiawh in Miss aa zuam ding thimnak ah Mai Zing Dawt Cer teinak a hmuh. Cu hnu ah Kalay Myo aiawh in aa zuam than i Myanmar ram huap in teinak a hmuh than hi a si. Mai Zing Dawt Cer hi Chin Christian University in BBA Degree a la cang mi a si. Amah hi fashion lei a zuam i a uar ngai mi a si.###
