Thantlang khua ah tuah mi Kum 72nak Chin Miphun Ni ah CNF le Khuami ai-awh in Dr. Salai Lian Hmung Sakhong nih Pu Lal Luai kong a chim mi cu February 24 ah The Hakha Post in fianternak a tuah.
“Chin Miphun Ni lio bia ka chim mi kong ah mi tampi nih Pu Lal Luai kong theih nan duh i kaa lawm ngaingai. Tuanbia umtuning (Historical fact) theih nan duh ca zong ah kaa lawm fawn. Pu Lal Luai kong kha biachimnak (speech) ah, chim ding in ka rak telh mi a si lo nain biachimnak theng cung, Thinthang cung ka kai ah khan, Daw Aung San Suu Kyi kha ka zoh i, a pu Bo Min Yawng kha Mirang nih thihdan an rak pek mi le Pu Lal Luai zong thihdan an pek ve mi (Capital Punishment) hna aa lawh mi tahchunh ka duh ruang ah ka chim mi a si. Pu Lal Luai cu Mirang a rak doh hna ca ah, Mirang nih Capital Punishment an pek. Asinain, an tlai kho lo. A hnu ah Mirang nih Lainu kuli an phurhter mi hna kha a zoh kho lo i, khuachung ah a hung kir. Khuachung a kir hnu tuanbia hi phun hnih in an chim. Kanmah Kokek Tuanbia (Local History) ahcun Buhva kam ah Mirang nih hri in a thih tiang an thlai tiah an chim tawn. Cucu Thantlang High School kan rak hmuh lio ah drama in hmuhsaknak an rak tuah. Cucu ka mitthlaam ah atu tiang a caam. Cun, Mirang nih an tial mi tuanbia (history) belte ahcun; a rak kir hnu in Capital Punishment kan pek lai, a hngawng ah hri in kan thlai lai an ti lio ah, a rak zaw i, a zaw mi cu thah phung a si lo ca ah, cu zing ahcun an that lo i, a zawtnak tu in a thi tiah, an tial. Kei kha bia ka chim lio ah, Local History, kan hmet lio kan rak zoh mi drama te kha ka mitthlaam ah a hung cuang i, cu ning cun ka chim mi a si,” tiah Dr. Salai Lian Hmung Sakhong nih The Hakha Post ah a chim.
Tutan Thantlang Chin Miphun Ni ah Dr. Salai Lian Hmung Sakhong nih, ramkheel, dothlennak, kahdaihnak, conglawmhnak, donnak, democracy federal, Panglong minthut le NCA tibantuk siaherh le biaroriak a chimnak ah Pu Lal Luai kong a comchih i atu bantuk in mizapi sin fianternak a tuah than mi a si. (By: KB)
