Chinmi ralzaam tampi an i dornak hmun a si mi Mizoram, Saiha khua ah Kum 75nak Chin Miphun Ni cu miphun le ram ca thlacamnak le Pathian thangthatnak in caan an hman.
Saiha khua Chin miphun Ni caan hmannak cu Lai Biakinn a si mi Zion Thar Biakinn ah an tuah. Thlacamnak ah aa tel mi tam deuh cu raal zaam an si. Thlacamnak, hlasaknak, Bible relnak, biatawi chimnak le thawngtha in thazaang peknak in caan an hman.
Ram le miphun ca thlacamnak, rammi ralkap hna le dohthlengtu dihlak ca thlacamnak, Ralzaam le raal ruang ah har a tong mi hna ca thlacamnak le a dangdang ca ti in thlacamnak ngeih a si.
Tu tan Saiha khua Chin Miphun Ni cu Myanmar Refugee Committee (Siaha) hrihawhnak in tuah mi a si i cuka hmun ah minung 200 hrawng an i tel kho. Saiha khua cu Myanmar ralzaam chungkhar 400 fai an i dornak khua a si i, Saiha District pumpi ah chungkhar in 1900 fai an i dor tiah kan theih.
