Cozah nih phungluut tein a samh lo mi hmun ah mah duhnak poh virhkhoih riangmang in hmun ngeih, licence tuah timh pawl hi atuahtu kanmah lila tu kan sung, hmang hrimhrim hlah u, tiah Chin Ramkulh Cozah Lamsuul le Pehtlaihnak Minister Pu Sui Thio nih April 2, The Hakha Post sin ah ralrinnak bia a chim than.
“Tutan hin cun, a voi 3nak hmanh ka chim a si cang lai. Chim peng a hau. Zeicahtiah, mah duhsalam in khuasa kan tam tuk. Cozah nih kan hun tawlrel taktak tik ah kanmah lila tu kha sual an kan phawt. Cucaah, ka nolh rih ko lai. Vawlei Tahnak Zung le Pengkomh Zung tuanvo ngeitu sin ah tangka va ziknawh riangmang in hmun ngeih, licence tuah hi i tim hrimhrim hlah u. Ramkulh Cozah nih phungluut tein kan tuah mi lawnglawng kha zulh khawh i zuam u,” tiah The Hakha Pist ah a chim.
Cun a peh rih mi cu, “Inn le hmun cawk tik ah pungsan 105/106 pohpoh kha cohlan lo ding a si. A hngal mi, a thei mi kha hal hmasa ah a tha. Cu hnu ah Ramkulh Cozah nih a theihpi mi kha i cawk ah a tha. Licence kong zong ah a ngeicia mi kong ah phihkharnak a um lo. A thar pawl belte ralrin a herh fawn. Min thlen in licence tuah, licence cheu le caansauhnak (tattanto) tibantuk zong a hlun asiloah a ngeicia mi ca ah cun aa rel ko. A thar nih ralrin a herh,” tiah a chimchap.
Hiti mah duhnak poh ah virhkhoih in hmun ngeih i timh hi a nehhnu ah ngaihchiatnak tiang a phan kho. Cucaah, Ramkulh Cozah nih a si khawh chung in acre 700 hmun samh mi a tawlrel cuahmah i hi hnu ah acre 500 hrawng samh than ding zong timhtuah a si. Cun, hi hmun virhkhoihnak kong ah Hakha khuachung, khualeng pin ah Falam lam Chuncung lam lei tiang zong ah Sipin nawlpeknak tel loin inn a sa mi an tampi. Sipin nawlpeknak le theihpinak tel lo hrimhrim in inn sak le hmun ngeih lo ding zong a cunglei Minister nih ralrin peknak ah a chim fawn.
