Magwe ramthen, Mindone peng chung in Mindone, Thayet, Kaanmah khua thum fonh PDF sakhaan pakhat cu a luancia September 4 ah ralhraang nih an luh hnawh hna i PDF 29 an tlaih hna tiah Mindone PDF nih an chim.
Tual chung PDF phu thum komh sakhaan hi dalaan thawng pek le lam hmuhsaknak ruang ah luh hnawh an ton hi a si i a luat mi zong an um tiah theih a si.
“Hi PDF phu komh hna hi tualchung ah kahdohnak zong a tuah peng mi an si. Ralhraang nih a lang in an kah tawn hna. Cun, an kawl lengmang hna. Atu tlaih an ton mi zong hi thawng petu dalaan nih lam hmuhsak in an sakhaan tiang a kalpi hna. An i ruah lo kar ah luh hnawh an ton hi a si. Minung 40 leng an luat i minung 29 an tlaih hna” tiah Mindone PDF chungtel Salai Aa Kar nih BBC ah a chim.
Sakhaan pawng um Laatpwa khuabawi le khuami cheukhat hna cu PDF sakhaan hi nan bawmh hna ti in an tlaih hna tiah a chim chap.
“Laatpwa khua ah tlaihkhihnak an tuah ca ah a luat mi khuami nih rak kan bawm u tiah an rak kan chimh. Khuabawi pa zong an tlaih. Sakhaan pawng um ahcun nan bawmh ko hna lai tiah ti in an tlaih hna hi a si” tiah Mindone PDF nawlngeitu nih a chimchap. Ref: BBC Burmese
