2020 kum Myanmar ram party tling democracy thimnak ah Chin Ramkulh, Mindat Peng in aa zuam ding mi NLD party Hluttaw Palai cheukhat nihin tiang meepek sawmnak an tuah mi kong ah khuami cheukhat le COVID-19 Response Committee lei nih an soisel hna tiah thawng kan theih.
Mindat khuapi chung ah COVID-19 zawtnak ngei minung 19 hmuh a si i, ramkheel party dang zong meepek sawmnak an i din tiah thawng kan theih.
Hi kong he pehtlai in Mindat khuasa Salai Mangom nih, “NLD lutlai Daw Aung San Suu Kyi amah pumpak in atu COVID-19 zawtnak a karh lio ah mibu pumh lo ding le meepek sawmnak tuah lo ding in a chim. Cun, Penguk Zung le Ngandamnak Zung lei nih mibu in nan um a si cun, kokek harton upadi in taza cuai ding in nawl an chuah.. Atu kan dirhmun ahhin rian ngei hna nih mizapi ca ah an ruah khawh mi a um lo ti awktlak a si. Khuami hna ca ahcun leeng nan chuah hmanh ah pee thum dan in nan um lai, chungkhar pakhat ah minung pakhat lawng leeng nan chuak lai tiin nawl an chuah. Hi a si ko bu ah party lei nih atu bantuk in pehzulh in an cawlcangh hi cu khuami pakhat ka sinak in ka lung a tling hrimhrim lo,” tiah The Hakha Post ah a chim.
Tutan thimnak ah Mindat Peng in party NLD, USDP, CNLD, UBP, ENDP, UDP le Independent party pawl an i zuam lai. Hi party hna chung ah Hluttaw Palai minung 22 an si tiah thawng kan theih.
Mindat Peng meepek sawmnak an tuah mi kong he pehtlai in Chin Ramkulh, NLD party meepek sawmnak ah rian ngei Salai Isaac Khen nih, “Atu bantuk in meepek sawmnak an tuah mi hi khuami hna nih an lung a tling lo a si ahcun, rian ngei sin ah report tuah awk a si ko. Cun, meepek sawmnak an tuah ning ah phung he aa kalh a si ahcun, zung lei zong ah report nak tuah ko hna seh,” tiah The Hakha Post ah a chim.
Mindat Peng chung ah COVID-19 zawtnak in a zaw mi minung 19 hmuh an si cang ca ah cheukhat party cu meepek sawmnak tuah loin an i din. Hi hna chung ah CNLD party, Hluttaw Palai hna telh in chungtel minung 30 cu Quarantine ah an lut hna tiah theih a si.
