Mindat khua laak kahdohnak lio ah tlaih mi SAC ralkap hna chung in pariat cu hriamnam he an zaam tiah People’s Spring nih a tial.
Nihin March 3 zinglei sml. 3:00 hrawng ah raal tlaih mi pariat nih a congtu hriamnam an chuh hna i Mindat peng he ramri a si mi Yaw hmunram ah an zaam tiah a langhter. Zei battalion in dah an zaam ti mi tu cu theih a si rih lo.
“Khuapi chung um battalion cun an si lo. Zei battalion lei dah an si ti mi kan fehter lio hna,” tiah CDF-Mindat in tuanvo ngeitu pakhat nih People’s Spring ah a chim.
A zaam mi SAC ralkap pariat nih cun lam ah an hmuh mi khuami pahnih cu lam chimtu ah an kalpi hna, tiah Yaw hmunram thawnghram cherhchan in an langhter.
Thongtla SAC ralkap pariat hriamnam he an zaam ti mi kong he pehtlai in CDF-Mindat lei aw ka a um rih lo caah hi thawng he pehtlai in The Hakha Post nih cun kan fehter kho rih lo.
Mindat khua cu CB le tangti phu nih 2024 December 21 ah an rak laak i, hriamnam tampi an laak khawh pin ah SAC ralkap tampi zong a nung in an rak tlaih hna tiah theih a si.
Photo: CDF-Mindat (Mindat khua laak kahdohnak ah tlaih mi SAC ralkap pawl hmanthlak hlun a si.)
