Mindat peng, Hmunram Number (1) Council nih Chinland Council ah mizapi hnatlaknak in kan i fonh cang, tiah nizan January 28 ah thawngthanhnak an tuah.
Mindat Hmunram Number (1) Council cu Mindat peng chung i, Teiknay (4) le Teiknay (11) chung ah a um mi mizapi fonh in an ser mi bu a si.
“Hmunram No. 1 ah a um mi mizapi ruahnak halnak kan tuah hnu ah atu bantuk in biachahnak kan tuah hi a si. Hmunram No. 1 ah a um mi mizapi nih hin ICNCC ah um kan duh ti hna sehlaw ICNCC zong ah kan um ko hnga. Mizapi hnatlaknak in Chinland Council ah i fonh ding ti a si caah Chinland Council ah kan i fonh cang lai,” ṭiah ṭuanvo ngeitu Ko Maung Maung nih Khonumthung ah a chim.
Chinland Council ah um ding in biachahnak an tuah cang caah January 28 thawk in Mindat Hmunram No.1 (Teiknay-4 le Teiknay-11) chung i ramkhel rian, ukhruainak, runvennak, biaceihnak, mizapi ṭhanchonak le pawngkam thingram kilvennak rian pawl cu Federal Democracy phungning in ser mi cozah a um hlanlo, hlan pupa hna upadi ning in tawlrel a si lai, tiah an langhter.
“Chin miphun le Chinram sersiamnak ca ah Chinland Council hi abiapi tuk,” tiah Mindat Hmunram Number (1) Council an langhter chap.
Chinland Council he an i fonh hlan ah Teiknay (4) ah hin CDF-Mindat Battalion (3) a rak um. Cu CDF-Mindat Battalion (3) cu atu ah cun Chinland Council ah aa tel cang.
Teiknay (11) ah a um mi CDF-Mindat Battalion (4) in cheuthum-cheuhnih hrawng zong Chinland Council ah an hun lut ve cang.
Chinland Council ah a lut mi Teiknay (4) le Teiknay (11) hi Kanpetlet peng he ramri ah a um mi an si, tiah theih a si.
