Chin Ramkulh, thlanglei Laitlang Mindat khuapi ah COVID-19 zawtnak ngei minung 19 hna cu damlei an panh nain mizaw le erhkhumh mi hna harnak an tong tiah Mindat sii-inn uk Dr. Zaw Win Naing sin in thawng kan theih.
Mindat sii-inn ah COVID-19 zawtnak ngei minung 19 an um i, hi hna chung ah minung 18 hi cu damlei an panh ko nain minung pakhat belte hi cu a taksa a linh a tla kho rih lo tiah theih a si.
Hi kong he pehtlai in Mindat sii-inn uk Dr. Zaw Win Naing nih, “Nihin tiang zawtnak ngei hi Mindat sii-inn ah minung 19 an um. Hi minung 19 chung ah minung pakhat te hi a taksa linhsat ning a zual ngai. Cozah lei in eidin lei pawl ah bawmhnak le pekchanhnak a um lo tik ah harnak an tong ngai. Cozah lei tu nih hin runvennak ca ah a herh mi thilri pawl lawng bawmhnak a pek. Mizaw chung ah siseh, erhkhumh mi hna chung ah siseh eidin lei harnak a tong mi hi an um. Erhkhumh mi chung ahhin chungkhar ning in a ummi zong an um tik ah eidin lei hi an i harh cem ko,” tiah The Hakha Post ah a chim.
Mindat sii-inn ah COVID-19 ngeih le ngeih lo cheknak seh zong chiah ding cu timhlamh a si nain a minung an i nguhdaih lo ca ah a tlamtling kho rih lo tiah thawng theih a si.
Cun, eidin lei harnak an ton mi kong he pehtlai in Mindat khuasa Salai Mangom nih, “Mindat ah zawtnak ngei minung 19 hmuh a si tik ah hi hna pawl he aa naihniam mi minung 100 leng erhkhumh an si. Minung zong hi an tam tik ah eidin lei harnak an tong lai lo ti awk hi cu a tha lo. Cozah lei nih keimah ka theih tawk ahcun eidin lei ah tuanvo an laak mi hi hmun khat lawng ah ka theih. A dangtu ka va theih lo zong a si kho mi a si ko,” tiah The Hakha Post ah a chim.
Mindat khuapi COVID-19 zawtnak runvennak ca ah tiin chungkhar pakhat ah minung pakhat lawng leeng chuahnak nawl an pek hna. Cun, COVID-19 mizaw minung pathum hna he naihniam in a ummi minung 102 hna cu voi hnih tiang zawtnak an chek hna nak ah minung 16 sin in zawtnak hmuh a si a taang mi minung 18 cu negative an si tiah kan theih.
