Mindat khuami nih an zaamtakmi inn 30 hrawng cu SAC ralkap nih October 1 an khangh hna, tiah thawng kan theih.
October 1 chunhnu suimilam pakhat hrawng ah, CDF-Mindat le SAC ralkap karlak ah kahdohnak a chuah caah, SAC ralkap pawl nih, Mindat in Matupi lei kalnak lamcung ah a ummi inn pawl, an khangh hi a si.
Tualchungmi pakhat nih, “An khangh hramhrammi a si ko. Chun suimilam hleihnih le pakhat karlak ah kahdohnak a chuak i cudihcun an khangh. Meithat mawtaw a mongtu zong an um lo caah mei a hmittu an um lo,” tiah a chim.
SAC ralkap pawl nih datsi i put in inn pawl an khangh hramhram caah inn 30 hrawng an khaang, tiah tualchungmi pakhat nih a chim.
Kanhnu August thla le September thla chung zong ah Mindat khua inn 40 hrawng cu SAC ralkap nih an khangh cang, tiah theih a si.
