Chin ramkulh, Mindat khuachung Khrihfa biakinn pakhat ah aa dor mi ralzaam minung 4 cu July 16 ah SAC ralkap nih an tlaih hna hnuah pathum cu an konglam hngalh a si ti lo tiah Mindat Zapi Ukhruainak in tuanvo ngei pakhat nih a chim.
Hi minung 4 tlaitu hna hi SAC ralkap LIB 274 battalion an si i, an tlaih mi hna hi ralram ah an thah theo hna lai ti zumh a si tiah a chim.
Tlaih an si hnuah an konglam hngalh ti lo mi hna cu Pu Hung Ki, Pu Cho Ki, Pu Hung Choi hna an si, a luat mi pakhat hi sii-ai in thlop cuahmah lio a si tiah Mindat Peng Zapi Ukhruainak in tuanvo ngei pakhat nih a chim.
“A luatmi hi khuaruahhar ngai a si, anih zong hi fak ngai in an hrem. Lungfim lo tiang in an hrem. A thi cang ti i an ruah hnuah SAC nih an hlonh. A lung a hun fim hnuah a zaam i a luat mi a si” tiah a chim.
Tlaihkhih mi hna hi Mindat khua kiangkap mi hna an si i, kahdohnak ruangah Mindat khuachung Biakinn ah a luancia kum hnih hrawng khan aa dor mi an si tiah kan theih.
Photo: Raal ruang ah a zaam mi hna hmanthlak hlun a si.
