Nihin April 1 ah SAC ralkap nih Mindat peng, circle (2) ah pehtlai in voi 2 vanlawng in kahdohnak a tuah caah innlo le thilri tampi an rawl, tiah Mindat Peng Mizapi Ukhruaitu Bu nih a thanh.
Nihin zinglei sml. 1:50 hrawng ah SAC nih Mindat peng, circle (2) i khuate pakhat pawng ah vanlawng in bomb voi 2 a thlak. Cu bomb thlaknak ah cun minung aa hlaim mi an um lo nain biaknak lei inn pakhat le tualchungmi inn pakhat an rawk.
Cun, chun sml. 11:30 hrawng ah circle (2) chung ṭhiamṭhiam ah SAC ralkap nih vanlawng pathum in voi 10 hrawng kahdohnak a tuah. Bomb a thlak pin ah Machine Gun zong in an kah chih caah innlo le thilri a rawlral mi an tam ngai.
Mindat Peng Mizapi Ukhruaitu Bu nih, “Vanlawng in an kah hna lio ah tualchungmi pawl cu khor an i cawh mi chung ah an luh manh dih caah aa hliam mi an um lo. Asinain, khuami hna inn, khua tilaak le thilri tampi an rawkral,” tiah a langhter.
March thla chung zong ah SAC ralkap nih Mindat peng chung ah vanlawng in kahdohnak voi 20 hrawng a tuah i, kum 6 ngakchia pakhat tel in tualchungmi pali an nunnak a liam cang.
