Chinram Thlanglei, Mindat khua SAC ralkap umnak hmun hna cu Chin Brotherhood nih November 9 thawk in an nam i ni thum pehtlai in kahdohnak a faak tiah tualchung mi sin in theih a si.
“Kahdohnak ni thum aa peh cang. SAC lei nih vanlawng le miakpi faak ngai in an hman. Inn zong an khangh i tam ngai an ciam cang. Zeizat set ti cu kan hngal kho lo,” tiah tualchung mi pakhat nih a chim.
Khah Lah Yah – 274 battalion hmun, palek sakhan le SAC ralkap hmunkhuarnak pawl ah an i kaap i, SAC Y-12 vanlawng nih pali phir bomb hna tel in bomb 30 leng a thlak tiah theih a si.
“Mindat Palek Sakhan Thlanglei khuahelnak lam ah a um mi inn hna cu SAC ralkap le palek nih petrol an toih i an khangh hna,” tiah tualchungmi Hkl Mindat nih a ṭial.
Tu zing ah Khah Lah Yah – 274 battalion nih miakpi an kah ruang ah Mindat khua Nichuahlei inn cheukhat zong an kaang tiah tualchungmi nih an chim.
August thla thawk in SAC ralkap nih Mindat khua cu vanlawng le drone in bomb an thlak, miakpi in an kah leng ah ni fatin ti awk in an khangh tiah Chin World nih cun a ṭial.
Chin Brotherhood nih 2024 chung ah an hmunram chung um SAC ralkap thianh dih ding hmui tinh he Mindat le Falam khua SAC ralkap an nam cuahmah hna tiah theih a si.
Photo: Hkl Mindat
