Mindat khuachung ah kahdohnak a um lai ti mi thawngpang a len caah khuami tampi cu kiangkap khuate le Magwe ramṭhen lei ah an zaam hna, tiah theih a si.
Mindat khua in Magwe ramṭhen Saw peng chung ah ralzaam 300 in 500 karlak hrawng an rak phan ṭhan, tiah ralzam bawmtu pakhat nih a chim.
“Mindat in a rak phan mi an tam ngai cang. Micheu cu Saw khuapi chung ah innhlang in an um hna. Ralzaam camp ah a um mi zong an um,” tiah a chim.
CDF pawl nih khua laak kahdohnak an thawk cang lai ti mi thawngpang ruang ah atu bantuk in Mindat khuami pawl an zaam hi a si, tiah ralzaam pakhat nih a chim.
Chinland Council ralkap nih Cikha le Tonzaang khua an laak hnu ah Chin Unau Phu nih Tedim khuapi doh an thawk ve i, khua dangdang zong ah khua laak kahdohnak a chuak lai ti mi thawngpang a hung leng ngai.
Matupi khua laak kahdohnak a chuak lai ti mi thawngpang zong a len caah Matupi khuami tampi cu Mizoram le kiangkap khuate pawl ah an zaam hna, tiah theih a si.
#TheHakhaPost
