Rakhine ram, Minbya peng Chinmi umnak Che-taung khua ah Cozah ralkap nih 2020 March 23 suimilaam 3:00 pm tluk ah Bomb a thlak i khuami minung 16 hliam an tuar, minung 1 a thi tiah kan theih.
Hi kong he pehtlai in Rakhine ram Chin Sianghleirun siangakchia phu lutlai Salai Nan Zaw Lin nih, “Atu tan an i kah hi zing suimilaam 5:00 am tluk in chun nitlak te an i kap. Zinglei sang ahhin AA nih an kah hmasa hna. An kir lei ah atu bantuk in Cozah ralkap lei nih raltuknak vanlawng in an kah ve hna. Bomb pakhat hi Chin khua a si mi Che-taung khua lai ah an thlak i a pawngkam ummi minung 4 fak taktak in hliam an tuar. Zingka tein an i kah ca ah thaithawh ei ngam lo le rawl chuang ngam loin khuami an um hna. Bomb an thlak hi zaanlei suimilaam 3:00 tluk ah a si,” tiah The Hakha Post ah a chim.
Rakhine ram Minbya peng ah Chin khua hi khua 30 leng an um i, hi khua 30 leng chung in ralzaam dirhmun ah a dir mi minung 4000 leng an si tiah kan theih.
Cun, “2020 March 23 kahdohnak i hliam a tuar mi minung 16 chung ah ngakchia kum 7 le kum 8 pahnih an i tel. Bomb thlak ruang ah inn thum ciam dihlak in a kaang. U Ngunh Thar Aung te hi an chungkhar ning in hliam fak ngai in an tuar. Atu hliam a tuar mi hna hi sii-inn ah an kalpi colh ngam hna lo. Kahdohnak an tih ca ah an i thup i tuzing lawng Minbya sii-inn ah an kal. Hliam a tuar mi chung in ngakchia pakhat tuzing ah a nunnak a liam,” tiah Rakhine ram Sittwe um Salai Htun Hlah Kyaw nih The Hakha Post ah a chim.
2020 March 23 suimilaam 5:00 am tluk hrawng ah AA hriamtlai phu nih Che-taung khua pawng Kannyi khua i a ummi No.9 ralkap sakhan an kah i atu bantuk in thil a cannak a si tiah kan theih.
