SAC ralkap nih Rakhine ramkulh, Minbya peng, Mantaung Chaungwa ah Chinmi pahnih le Rakhine miphun pathum an thah hna tiah theih a si.
Minbya peng No. 9 Central ralkap sianginn kahdohnak in a zaam mi SAC ralkap pawl nih raalphaw ah khuami an tlaih hna i, AA nih an chanhchuah hna caah a luat ṭhan mi, Taungpauk khua um Chinmi U Maung Hla Win nih a chim mi a si.
“Kan phanh in kan in thlah ṭhan hna lai, zeihmanh nan lungre thei hlah uh an kan ti i a hnu ahcun Mantaung Chaungwa kan phanh ah Rakhine pathum le Chinmi pahnih an thah hna… Pachaungwa ah kan riak, Kolung tlang kan kai. Kolung tlang cung ah cun an pu nih nawl a pek hna tikah kanmah chung in pahra thahchap an kan timh,” tiah a chim.
Cu bantuk in SAC ralkap nih thah an timh ko hna nain lam ah caw pakhat le naa pakhat an kah hna i sa can tuding ah an that rih hna lo. A thaizing zinglei sml. 5:30 ah AA nih an chanhchuah hna tiah theih a si.
“An kan thah ahcun caw le naa sa a can tu ding an um ti lo. A caan zong a um ti lo… Thaizing zinglei ah a kan thah lai ti cu kan hngalh. Zan khuadei it lo in kan ṭhu. Khua a dei hlan zinglei sml. 5:30 hrawng ah Rakhine Ralkap AA nih a rak kan khamh,” tiah U Maung Hla Win nih a chim.
Minbya peng No. 9 Central ralkap sianginn cu February 26 ah AA nih an rak laak. Cu kahdohnak in a zaam mi SAC ralkap pawl nih tualchung mi pawl ralphaw ah hmang in an hruai hna i an thah hna hi a si.
Photo: Hmanthlak hlun a si.
