Military Division Commander tel in SAC ralkap 100 leng, ralkap chungkhar hna le Civil Zung bawi hna nih AA sin ah hriam an chiah
Rakhine ramkulh, Minbya khuapi hrambunh SAC ralkap camp dihlak kan laak khawh cang tiah AA nih nizan February 6 ah a thanh.
Minbya ah Western Military Command kuttang SAC ralkap battalion a si mi LIB-379, LIB-380 le LIB-541 an um. Khua he meng 2 fai aa hlatnak ah a um mi cu battalion pathum lak ah LIB-380 cu January thla dih hlan ah AA nih an rak laak cang i a taang mi LIB-379 le LIB-541 cu zarh khat a rauh hnu ah an laak khawh hi a si.
A taang mi battalion camp pahnih an laak lio ah cun SAC ralkap hna le an chungkhar tampi nih atu bantuk in AA sin ah hriamnam an chiah cu a si tiah kan theih.
“Minbya ah a um mi SAC ralkap battalion dihlak in kan laak khawh cang. Atu hi raal lam sialnak kan tuah cuahmah lio a si,” tiah AA chimphuannak nawl ngei Khine Thu Kha nih Myanmar Now ah a chim.
AA sin ah hriamnam a chia mi milu 500 leng an si i cu chung ah cun Military Division Commander tel in SAC ralkap 100 leng, ralkap chungkhar hna le SAC kuttang zung riantuan bawi pawl an i tel tiah tualchung media a si mi Narinjara nih a tial.
Photo: 3 Brotherhood Alliance
