Rakhine ramkulh, Minbya ah AA nih SAC raltuknak tilawng pakhat pil lak in an kah khawh than tiah Chaklei Unau Thum Phu nih nizan February 12 ah chuah mi cathanh ah an tial.
Cu tilawng cu Minbya khua Nitlaklei, Kyarshaybin khuate pawng tiva chung ah an kah i a pil mi a si, tiah tuahchung mi hna chim mi cherhchan in Narinjara nih a tial
February 7 le 8 ah SAC raltuknak tilawng pahthum cu AA nih tiva chung ah pil lak in an rak kah hna bantukin, nizan February 12 zong ah a dang pakhat pil lak in an kah than hi a si.
AA ralkap nih an laak mi Minbya khuapi cu SAC nih ke ralkap, ti ralkap le van lei in an doh cuahmah lio ah atu bantuk in raltuknak tilawng pakhat an sungh than hi a si.
Rakhine ramkulh ah AA le SAC kar kahdohnak a faak i SAC nih vanlawng le tilawng in siseh, miakpi in siseh, kahdohnak a tuah caah sualnak ngei lo khuami tampi an thi i tampi hma an pu tiah theih a si.
Raltuknak ah a sung cuahmah mi SAC nih “Operation 1027” thla hnih chung ah Rakhine ramkulh chung khuapi, peng hna le ralkap camp tampi an sungh caah AA nih a laak mi peng pawl cu vanlawng le tilawng in nifatin a kah hna tiah February 12 ah chuah mi Chaklei Unau Thum Phu cathanh ah an langhter.
Photo: 3 Brotherhood Alliance
