Kawl phunṭanh kal sual phungki Poh Kodaw hruainak in SAC bawizik Min Aung Hlaing a rian in i dinh ding January 16 ah Pyin Oo Lwin khua ah duhnak langhternak an tuah, tiah theih a si.
“Atulio Tatmadaw luzik (Min Aung Hlaing) hi biaknak lei ah aa pe mi a si bang in hmaipanh tein a um zungzal mi a si caah ralkap hruaitu rian nakin mipi hruaitu ah aa tlak deuh lai. Cucaah, anih cu vuanci rian pakhatkhat tu pe usihlaw, ralkap hruaitu rian hi ahodah kan ṭuanter ah a ṭhat hnga? Soe Win a um ko si. A muihmai le a rianṭuan ning khi ṭha tein ngia hmanh u, ralkap ṭha taktak a si ko lo maw? Nan duh cio ko lo maw? Soe Win tu nih Tatmadaw luzik ṭuan sehlaw, Min Aung Hliang cu vuanci rian pakhatkhat pe usih,” tiah phungki Poh Kodaw nih mizapi tonpumhnak ah a chim.
Poh Kodaw nih atu bantuk in bia a chim dih ah mizapi nih, “Kan duh” tiah Min Aung Hlaing nakin Soe Win an duhnak cu awthang in an leh ve.
Mizapi hmai ah Min Aung Hlaing a rian dinhter ding in a aupitu Poh Kodaw hi Magwe ramṭhen, Poh peng ah a ummi a si i, Kawl miphun le Buddhist biaknak a dirkamhtu Ma Ba Ta chungtel a si pin ah SAC zong a ṭanh ngaitu a si.
