February 28 zinglei suimilam 10:30 tluk ah Kalay khuapi chung ummi tat-oo tida sang i a um mi Biblical Church of Christ (BCC) Khrihfabu riantuantu umnak (Quarter) ah meikanghnak a chuak tiah theih a si.
Hi inn kanghnak kong he pehtlai in Khrihfabu ah chairman a si mi Pu Phun Lian nih a tang lei bantuk in a chim.
“Mei hi zinglei suimilam pahra le cheu (10:30 am) tluk ahhin a si. Hi inn kanghning hi zeitindah aa thok timi kan dothlat tik ah electric mei in si dawh a si ko. Cun, Mei aa thoknak hi Khrihfabu riantuantu hna umnak (Quarter) in a si,’ tiah The Hakha Post ah a chim.
Inn kanghnak ahhin meizung lei in meithat motor zong a ra i, palek le ralkap zong an ra ve tiah theih a si. Hi thawngpang kan lak tiang ah, BCC Khrihfabu pastor cu mei kanghnak kong he pehtlai in biahalnak tuah ding ah palek nih sakhan lei ah an kalpi tiah theih a si.
February 22 cu Milk Tea Alliance tlangtar in Myanmar ram nawlngeihnak tlaitu ralkap uknak duh lo lamzawhnak cu Myanmar ram innpa a si mi ram 4 tluk he lamzawhnak cu tuahti a si i, cu lamzawhnak ni February 28 chun ah tu bantuk in BCC Khrihfabu nih innkanghnak an ton hi a si.
