Mizapi nih sermi le thimmi Myanmar ram Cozah sin in ralkap nih February 1 i uknak a laak hnu Chin Ramkulh chung ah February 7 in ralkap uk kan duh lo ti langhternak ca ah mizapi lamzawh dih cio a si i, February 28 i Chin Ramkulh chung Milk Tea Alliance timi min bunh in lamzawhnak ah Falam le Matupi ah palek lei nih mitthli tla
knak bomb an puahhnawh hna tiah theih a si.
2021 February 28 Chin Ramkulh chung lamzawhnak ah mitthli tlaknak bomb zuun 18 an puah i Falam ah zuun thum le Matupi ah zuun 15 a si tiah kan theih.
Falam i lam an zawhmi kong he pehtlai in, rianngeitu pakhat nih, “February 28 Falam khuapi lam kan zawhnak ah ralkap le palek lei nih mizapi thencheu nakding ca ah tiin mitthli tlaknak bomb voi thum an kan puah hnawh. Hi bomb puahnak ah faak in aa hliam mi cu kan um lo nain, minung pakhat tu hi cu a mit tlawmpal te a thih. Atu cu a tha than cang ko. Cun, pa minung pathum an tlaih hna i Falam ralkap sakhan ah an kalpi hna. Nihin tiang ahcun an thlah rih hna lo, “ tiah The Hakha Post ah a chim.
Hakha i a ni 20nak mizapi lamzawhnak zong ah mizapi thencheu nakding ca ah tiin ti kahnak le meithal puah hnawhnak voi khat a chuak.
Cun, Matupi mitthli tlaknak bomb an puah mi kong he pehtlai in Matupi Peng Hluttaw Palai Salai Aung Lian nih, “February 28 Matupi khuami hna dai tein lamzawh an tuahnak ah mitthli tlaknak bomb zuun 15 an kan puah hnawh. Cu lawng hmanh si loin, a hnulei deuh a ummi hna palek le ralkap nih kan in tuk hna lai, kan inden hna lai tiah an tlerhkhawn hna. Hihi kan cohlang bak lo, aruang cu mizapi lei nih sualnak an kawl mi a um lo. Dai tein lamzawh le duhlonak langhter dih cio a si ko. Hi mitthli tlaknak bomb an puahnak ah aa hliam mi aa khawngdeeng mi cu an um lo,” tiah The Hakha Post ah a chim.
2021 February 28 Myanmar ramhuap Milk Tea Alliance timi min bunh in lam zawhnak tuah ni ah minung 23 hrawng an nunnak a liam i tlaihkhih a tong mi zong an tam tiah Myanmar ram Media nih an langhter.
