Faak ngaiin a rak soiseltu pa JD Vance (kum 39) cu Donald Trump nih amah he rian ṭuan ṭi ding in Vice President ah a thim, tiah theih a si.
Nizaan cacawn nikhat ni ah Milwaukee khua ah Republican National Convention tonpumhnak an ngei i, Trump cu 2024 US President thimnak ah Republican Party aiawh in i cuh ding in an fehter.
Cu hmun ah cun amah he rianṭuan ṭi ding in Ohoi ramkulh aiawh in Senator a ṭuan lio mi JD Vance cu Vice President caah Trump nih a thim.
JD Vance hi 2016 thimnak lio hrawng ah Trump faak ngai in a rak soisel tawntu a si. “Mihrut” tiah a soisel lawng si lo in “American Hitler” tiah mizapi theih in Trump cu a rak ti.
Amah a soisel ngaitu pa Vice President ah a thim mi kong he pehtlai in micheukhat nih Trump an thangṭhat i, micheu ve nih cun “DJ Vance nih hin Trump ca ah ṭhatnak nakin chiatnak tu a chuahpi deuh lai” tiah an ruahnak an chim ve.
US rampi President thimnak cu atu kum November 5 ah an tuah te lai, tiah theih a si.
