Nihin (September 14) hi ka meehmun Tedim lei asiloah Tonzaang (Cikha) lei ah kal kaa thawh lai, meepek sawm ka thok ve cang lai, zei party Palai hmanh nih an ka tei lai ka zum lo, tiah atulio Social Affairs Minister Pu Pau Lun Min Thang nih a chim.
“Kei cu nan ka hngalh bang, Zomi Congress for Democracy (ZCD) party ka si. Kei hi Tonzaang Pyine meehmun No. 2 Palai in kaa cuh lai. Keimah he aa cuh ding mi hna hi; Pi Man Lam Nuam (UDP), Pu Thang Sing Zam (NLD), Pu Ko Deih Piang (USDP), Pu Pum Do Kam (UBP), le Pu Pau Sian Khai (ZERDP) hna an si. 2015 kum lio ah fak nawn in ka tei cang mi zong an um i tutan thimnak zong ah ka tei thiamthiam hna lai, tiah ka zumh ko. Cun, meepek sawm ti mi hi kei ka ca ahcun, kum 4 le cheu ka riantuan chung ah keimah ca thatnak ka tuah mi a um lo. Mizapi ca ah ka tuan ko ca ah cucu ka meepek sawm can zong a si kha mizapi nih an hmuh mi a si ko ca ah ka tei ko hna lai tiah ka zumh ko,” tiah Chin Ramkulh Cozah Social Affairs Minister Pu Pau Lun Min Thang nih The Hakha Post ah a chim.
Minister Pu Pau Lun Min Thang nih The Hakha Post ah a rak chim bal mi cu, “Teinak hmuh ding hi za ah za in kaa zum ko. Asinain, minung cu sungh phung zong a si tik ah sungh ding zong ah ready thiamthiam ka si ko. Cun, teinak ka hmuh i Minister theng ka va tlin ti lo zong ah Hluttaw Palai pakhat dirhmun in meeting ah kan ram le miphun ca ah a herh mi chimrel hi biapi bik a si ko ca ah cucu fakpi in ka tuan ko lai,” tiah a rak chim bal.
Teinak ti mi cu Pathian le mizapi kutcung ah a um mi a si ko. Tutan thimnak zong ka meehmun minung hna nih an ka dirpi ti ka hmuh tik ah teinak ka hmuh rih ko lai, tiah Minister Pu Pau Lun Min Thang nih The Hakha Post ah a chimchap.
